Në fshatrat shqiptare puna nuk pushon kurrë dhe çdo fidan i mbjellë është një akt besimi te Shqipëria. Por bashkë me përkushtimin, fermerët shqiptarë përballen me kosto të larta, braktisje, mungesë tregu.
Fermeri nuk ka nevojë për mëshirë. Ai ka nevojë për një shtet që e njeh, e ndihmon dhe e respekton. Ai nuk kërkon privilegj. Fermeri shqiptar kërkon që shteti të mos i presë rrugën kur ai çon produktet e tij në treg. Programi ynë për bujqësinë është ndërtuar pikërisht mbi këtë parim: mbrojtje e prodhimit vendor dhe treg i lirë.Që në vitin e parë të qeverisjes sonë: 
Do të investojmë 100 milionë euro në subvencione direkte për bujqësinë.
Do të ulim me 30-40% kostot e prodhimit, duke mbështetur fermerët me fara, fidane, plehra, pesticide dhe karburant.
Do të garantojmë akses në tregje publike, ku fermerët të shesin pa ndërmjetës dhe pa frikë.
Do të thjeshtojmë procedurat dhe do t’i heqim nga rruga burokracitë që sot i pengojnë.
Do ta trajtojmë fshatin si një pjesë aktive të së ardhmes, jo si mbetje të së shkuarës.Nuk do të ketë Shqipëri të zhvilluar pa një fshat të gjallëruar. Nuk do të kemi ekonomi të fortë pa fermerë të mbrojtur. Nuk do të kemi agroturizëm konkurrues pa prodhim shqiptar. Ka ardhur koha që politika të mos jetë spektakël fjalësh, por garanci për ata që e mbajnë vendin në këmbë me punë, jo me premtime.
